uThte hain bulbule lab-e-wijdan ba-sad-KHarosh

uThte haiñ bulbule lab-e-vijdāñ ba-sad-ḳharosh

duniyā-e-'aql-o-vajd kī hairānī rū-e-dosh

pinhāñ haiñ sad-savāl pas-e-parda-e-hayā

dil de diyā javāb thā lekin rahe ḳhamosh

āñkheñ nazar samajh sabhī andām-e-his tamām

āvāz-e-'azm niyyateñ sunte ba-hosh-e-gosh

bāzār-e-zindagī ke ḳharīdār-o-mushtarī

be-rah-ravī meñ ho ga.e sab hī anā-farosh

ik mauj-e-ġham-gazīdgī se haiñ niDhāl sab

ā.īna-e-durust meñ sab hī sarāb-posh

dekhūñ jidhar faqat hai hayā-hū-e-kām-o-āz

miltā hai jo ġharīq-e-balā-hā-e-nāv-nosh

'āhan' ba-hāl-e-be-ḳhabarī sab safar hazar

mātam-kunāñ ho kyoñ na hama-vaqt ab sarosh

uThte hain bulbule lab-e-wijdan ba-sad-KHarosh

duniya-e-'aql-o-wajd ki hairani ru-e-dosh

pinhan hain sad-sawal pas-e-parda-e-haya

dil de diya jawab tha lekin rahe KHamosh

aankhen nazar samajh sabhi andam-e-his tamam

aawaz-e-'azm niyyaten sunte ba-hosh-e-gosh

bazar-e-zindagi ke KHaridar-o-mushtari

be-rah-rawi mein ho gae sab hi ana-farosh

ek mauj-e-gham-gazidgi se hain niDhaal sab

aaina-e-durust mein sab hi sarab-posh

dekhun jidhar faqat hai haya-hu-e-kaam-o-az

milta hai jo ghariq-e-bala-ha-e-naw-nosh

'ahan' ba-haal-e-be-KHabari sab safar hazar

matam-kunan ho kyon na hama-waqt ab sarosh