utri hai aasman se jo kal uTTha to la

utrī hai āsmāñ se jo kal uTThā to lā

tāq-e-haram se shaiḳh vo botal uTThā to lā

lailā ke dil meñ qais nikal aa.egī jagah

tū sar par aaj najd kā jangal uTThā to lā

dhonā hai dāġh-e-jāma-e-ehrām sub.h sub.h

hujre se shaiḳh paanī kī chhāgal uTThā to lā

mujh ko bhī intizār thā abr aa.e to piyūñ

saaqī agar ye sach hai ki bādal uTThā to lā

vo husn-e-vaz.a dekheñge kyūñkar juḌe haiñ dil

zar-gar na.ī banī hai jo haikal uTThā to lā

tāq-e-haram meñ shaiḳh gulābī hai phuul sī

is kaam kā milegā tujhe phal uTThā to lā

ban jaa.e din ye tīra-shab-e-hijr ai nadīm

raushan thā jis se tuur vo mash'al uTThā to lā

maiñ kaam lūñgā abr kā ai rind taan kar

tū mujh faqīr-e-mast kā kambal uTThā to lā

ai shaiḳh mez se dam-e-iftār farsh par

piine ko phuul khāne ko kuchh phal uTThā to lā

nāseh kā muñh ho band chakhā duuñ sharāb-e-ḳhuld

saaqī zarā 'riyāz' kī botal uTThā to lā

utri hai aasman se jo kal uTTha to la

taq-e-haram se shaiKH wo botal uTTha to la

laila ke dil mein qais nikal aaegi jagah

tu sar par aaj najd ka jangal uTTha to la

dhona hai dagh-e-jama-e-ehram subh subh

hujre se shaiKH pani ki chhagal uTTha to la

mujh ko bhi intizar tha abr aae to piyun

saqi agar ye sach hai ki baadal uTTha to la

wo husn-e-waza dekhenge kyunkar juDe hain dil

zar-gar nai bani hai jo haikal uTTha to la

taq-e-haram mein shaiKH gulabi hai phul si

is kaam ka milega tujhe phal uTTha to la

ban jae din ye tira-shab-e-hijr ai nadim

raushan tha jis se tur wo mash'al uTTha to la

main kaam lunga abr ka ai rind tan kar

tu mujh faqir-e-mast ka kambal uTTha to la

ai shaiKH mez se dam-e-iftar farsh par

pine ko phul khane ko kuchh phal uTTha to la

naseh ka munh ho band chakha dun sharab-e-KHuld

saqi zara 'riyaz' ki botal uTTha to la