dariya-e-ashiqi mein jo the ghaT ghaT sanp

dariyā-e-āshiqī meñ jo the ghaaT ghaaT saañp

le ga.e sapere vaañ se bahut bhar ke baaT saañp

az-bas-ki us ke zahr pe ġhālib hai zahr-e-ishq

mar jaave hai vahīñ tire āshiq ko kaaT saañp

dariyā meñ sar ke baal koī dho gayā magar

lahroñ ke ho rahe haiñ jo yuuñ baara baaT saañp

nāmard se bhalā jaTa.ī ḳhaak phir huī

samjhā jab apnī bhaiñs kī rassī ko jaaT saañp

tahrīk-e-zulf se tirī bād-e-sumūm ne

kahte haiñ dasht-o-dar meñ diye baaT baaT saañp

the jis zamīñ pe sandal-e-pā ke tire nishāñ

jiite haiñ ab vahīñ kī zarā ḳhaak chaaT saañp

sāhil pe us kī ja.ad-e-musalsal ke aks se

dariyā meñ dhobiyoñ ko nazar aa.e paaT saañp

bañgle meñ jā ke ḳhaak rahe koī 'mus.hafī'

kar deñ haiñ aadmī kā yahāñ jī uchāT saañp

dariya-e-ashiqi mein jo the ghaT ghaT sanp

le gae sapere wan se bahut bhar ke baT sanp

az-bas-ki us ke zahr pe ghaalib hai zahr-e-ishq

mar jawe hai wahin tere aashiq ko kaT sanp

dariya mein sar ke baal koi dho gaya magar

lahron ke ho rahe hain jo yun bara baT sanp

namard se bhala jaTai KHak phir hui

samjha jab apni bhains ki rassi ko jaT sanp

tahrik-e-zulf se teri baad-e-sumum ne

kahte hain dasht-o-dar mein diye baT baT sanp

the jis zamin pe sandal-e-pa ke tere nishan

jite hain ab wahin ki zara KHak chaT sanp

sahil pe us ki jad-e-musalsal ke aks se

dariya mein dhobiyon ko nazar aae paT sanp

bangle mein ja ke KHak rahe koi 'mushafi'

kar den hain aadmi ka yahan ji uchaT sanp