wade diye the usne nishani to thi nahin

va.ade diye the us ne nishānī to thī nahīñ

yādoñ pe ham ne film banānī to thī nahīñ

bas dekhnā thā terī hathelī pe ek naam

ham ne tumhārī shaam churānī to thī nahīñ

kirdār kī aziyyateñ kuchh pūchhiye na bas

be-rabt thiiñ lakīreñ kahānī to thī nahīñ

har ek shaḳhs khojne meñ thā lagā huā

maiñ ne kisī ko baat batānī to thī nahīñ

kuchh vaqt bas guzārnā thā ghar ke sahn meñ

dīvār jo girā.ī uThānī to thī nahīñ

is silsile ko roknā bhī ab yahīñ pe thā

ye baat ham ne aage chalānī to thī nahīñ

majnūñ ke naam ek ilāqa kiyā raqam

sahrā kī ḳhaak shahr meñ laanī to thī nahīñ

shohrat kisī ke ġham kī huī hai atā 'zubair'

izzat ye shā.irī se kamānī to thī nahīñ

wade diye the us ne nishani to thi nahin

yaadon pe hum ne film banani to thi nahin

bas dekhna tha teri hatheli pe ek nam

hum ne tumhaari sham churani to thi nahin

kirdar ki aziyyaten kuchh puchhiye na bas

be-rabt thin lakiren kahani to thi nahin

har ek shaKHs khojne mein tha laga hua

main ne kisi ko baat batani to thi nahin

kuchh waqt bas guzarna tha ghar ke sahn mein

diwar jo girai uThani to thi nahin

is silsile ko rokna bhi ab yahin pe tha

ye baat hum ne aage chalani to thi nahin

majnun ke nam ek ilaqa kiya raqam

sahra ki KHak shahr mein lani to thi nahin

shohrat kisi ke gham ki hui hai ata 'zubair'

izzat ye shairi se kamani to thi nahin