wah kya dhum se aashiq ka janaza nikla

vaah kyā dhuum se āshiq kā janāza niklā

sab ko dhokā huā samjhe ki ye dūlhā niklā

ġhair samjhe the jise apnā shanāsā niklā

ġhaur karne se vo mehmān hamārā niklā

yār-o-aġhyār ne mayyat ko diyā thā kāñdhā

tere āshiq kā ajab shaan se lāsha niklā

yuuñ to lākhoñ haiñ tire chāhne vaale ḳhvāja

jāñ-nisāroñ meñ tire maiñ hī akelā niklā

sāqiyā mast huā aaya jo majlis meñ tirī

ik tirā maiñ hī nahīñ vālih-o-shaidā niklā

ruḳh-e-anvar se haTā jab ki naqāb-e-gesū

koī muztar koī majnūñ koī kushta niklā

huā ghāyal tirī nazroñ kā paḌī jis pe nazar

tirī mahfil se 'qamar' bhī to taḌaptā niklā

wah kya dhum se aashiq ka janaza nikla

sab ko dhoka hua samjhe ki ye dulha nikla

ghair samjhe the jise apna shanasa nikla

ghaur karne se wo mehman hamara nikla

yar-o-aghyar ne mayyat ko diya tha kandha

tere aashiq ka ajab shan se lasha nikla

yun to lakhon hain tere chahne wale KHwaja

jaan-nisaron mein tere main hi akela nikla

saqiya mast hua aaya jo majlis mein teri

ek tera main hi nahin walih-o-shaida nikla

ruKH-e-anwar se haTa jab ki naqab-e-gesu

koi muztar koi majnun koi kushta nikla

hua ghayal teri nazron ka paDi jis pe nazar

teri mahfil se 'qamar' bhi to taDapta nikla