wah kya hum ko banaya aur bana kar rah gae

vaah kyā ham ko banāyā aur banā kar rah ga.e

vasl kā muzhda sunāyā aur sunā kar rah ga.e

le gayā shauq us ke dar tak phir kamī himmat ne kī

halqa-e-dar ko hilāyā aur hilā kar rah ga.e

maiñ ne jo apne dil-e-gum-gashta kī pūchhī ḳhabar

sar hilāyā muskurā.e muskurā kar rah ga.e

ġhairat-e-dushman kī ḳhātir merī ġhairat laa.ī rañg

mujh ko mahfil meñ bulāyā aur bulā kar rah ga.e

kaam rone se bhī 'sāqī' apnā kuchh niklā nahīñ

likkhā qismat kā miTāyā aur miTā kar rah ga.e

wah kya hum ko banaya aur bana kar rah gae

wasl ka muzhda sunaya aur suna kar rah gae

le gaya shauq us ke dar tak phir kami himmat ne ki

halqa-e-dar ko hilaya aur hila kar rah gae

main ne jo apne dil-e-gum-gashta ki puchhi KHabar

sar hilaya muskurae muskura kar rah gae

ghairat-e-dushman ki KHatir meri ghairat lai rang

mujh ko mahfil mein bulaya aur bula kar rah gae

kaam rone se bhi 'saqi' apna kuchh nikla nahin

likkha qismat ka miTaya aur miTa kar rah gae