waiz ki zid se rindon ne rasm-e-jadid ki

vaa.iz kī zid se rindoñ ne rasm-e-jadīd kī

ya.anī mah-e-siyām kī pahlī ko iid kī

marne ke ba.ad bhī ye tamannā thī diid kī

āñkheñ huiiñ na band tumhāre shahīd kī

phir jins-e-dil na apnī kisī ne ḳharīd kī

sach hai ki qadr kuchh nahīñ māl-e-mazīd kī

ye vaqt-e-chashm-e-poshī-e-ahl-e-vafā nahīñ

jaan āñkhoñ meñ hai yaar tire mahv-e-dīd kī

missī dahān-e-tañg kī dekhī to shak huā

añgushtarī hai koī nagīn-e-hadīd kī

vo shoḳh jañg-jū jo hamāre gale milā

mātam muḳhālifoñ ne muhibboñ ne iid kī

aalam hai chashm-e-shauq kā har ek zarre meñ

barbād ḳhaak hai ye kisī mahv-e-dīd kī

kyā be-nuqat sunā.ī haiñ us tifl-e-shauq ne

qāsid ne naama de ke talab jab rasīd kī

kyuuñ vo savāl-e-vasl kā dete nahīñ javāb

hājat hai un ke qufl-e-dahan ko kalīd kī

ġhusse se aag ho ke hue tar pasīne meñ

itr-e-bahār husn kī apne kashīd kī

kis roz maiñ ne mus.haf-e-ruḳhsār mas kiyā

jhūTī na qasmeñ khaao kalām-e-majīd kī

dekhe na pīr-zāl jahāñ ko uThā ke aañkh

mardoñ meñ aabrū nahīñ kuchh zan-murīd kī

be-shubah ai 'qalaq' sag-e-duniyā hai vo bashar

jis ne ba-dil itā.at-e-nafs-e-palīd kī

waiz ki zid se rindon ne rasm-e-jadid ki

yani mah-e-siyam ki pahli ko id ki

marne ke baad bhi ye tamanna thi did ki

aankhen huin na band tumhaare shahid ki

phir jins-e-dil na apni kisi ne KHarid ki

sach hai ki qadr kuchh nahin mal-e-mazid ki

ye waqt-e-chashm-e-poshi-e-ahl-e-wafa nahin

jaan aankhon mein hai yar tere mahw-e-did ki

missi dahan-e-tang ki dekhi to shak hua

angushtari hai koi nagin-e-hadid ki

wo shoKH jang-ju jo hamare gale mila

matam muKHalifon ne muhibbon ne id ki

aalam hai chashm-e-shauq ka har ek zarre mein

barbaad KHak hai ye kisi mahw-e-did ki

kya be-nuqat sunai hain us tifl-e-shauq ne

qasid ne nama de ke talab jab rasid ki

kyun wo sawal-e-wasl ka dete nahin jawab

hajat hai un ke qufl-e-dahan ko kalid ki

ghusse se aag ho ke hue tar pasine mein

itr-e-bahaar husn ki apne kashid ki

kis roz main ne mushaf-e-ruKHsar mas kiya

jhuTi na qasmen khao kalam-e-majid ki

dekhe na pir-zal jahan ko uTha ke aankh

mardon mein aabru nahin kuchh zan-murid ki

be-shubah ai 'qalaq' sag-e-duniya hai wo bashar

jis ne ba-dil itaat-e-nafs-e-palid ki