wajibi baat kahin zara kahiye

vājibī baat kahīñ zarā kahiye

barī lagtī hai sab ko kyā kahiye

mujh ko ik ye baḌī sī hairat hai

bure ko kis tarah bhalā kahiye

nekī kā phal badī lagā hone

is zamāne kā kyā gila kahiye

charḳh-e-zālim ne sab ko Daalā piis

is ko tahqīq āsiyā kahiye

aur hī ahvāl dekhtā huuñ maiñ

kis ke aage ye mājrā kahiye

jā-ba-jā chhūTeñ jhuuT ke shīshe

ye bhī yāroñ kā ishqalā kahiye

ammī kahte haiñ ham to haiñ fāzil

bevaqūfoñ kā dar khulā kahiye

apnī karte haiñ aap hī tārīf

un ke ta.iiñ ko to chūtiyā kahiye

be-shu.ūrī pe bas-ki haiñ nāzāñ

kyuuñ na ab un ko nā sazā kahiye

shaiḳh-jī ne kiyā hai aaj ḳhizāb

is ko būḌhe kā chochalā kahiye

logoñ ke phoḌtā phire shīshe

mohtasib ko to masḳharā kahiye

poch pādar huā bake hai suḳhan

nāseh ko ḳhvāh-maḳhvāh saḌā kahiye

apnā sar phoḌtā hai aap raqīb

shauq se is ko mud-jhaḌā kahiye

maare ḳhandoñ ke mard-e-ādam ko

koī pūchhe nahīñ hai kyā kahiye

DāḌhī milā kī go ki hai ḳhū-gīr

par mahādev kī jaTā kahiye

jin kī hurmat pe kuchh nahīñ hai nigāh

in ko pā-posh kā talā kahiye

chhupte phirte haiñ vaqt-e-jañg-o-jadal

buzdilā un ko barmalā kahiye

ḳhud-pasandī meñ ġharq hai aalam

'nayan' ko kis ko ab burā kahiye

wajibi baat kahin zara kahiye

bari lagti hai sab ko kya kahiye

mujh ko ek ye baDi si hairat hai

bure ko kis tarah bhala kahiye

neki ka phal badi laga hone

is zamane ka kya gila kahiye

charKH-e-zalim ne sab ko Dala pis

is ko tahqiq aasiya kahiye

aur hi ahwal dekhta hun main

kis ke aage ye majra kahiye

ja-ba-ja chhuTen jhuT ke shishe

ye bhi yaron ka ishqala kahiye

ammi kahte hain hum to hain fazil

bewaqufon ka dar khula kahiye

apni karte hain aap hi tarif

un ke tain ko to chutiya kahiye

be-shuuri pe bas-ki hain nazan

kyun na ab un ko na saza kahiye

shaiKH-ji ne kiya hai aaj KHizab

is ko buDhe ka chochala kahiye

logon ke phoDta phire shishe

mohtasib ko to masKHara kahiye

poch padar hua bake hai suKHan

naseh ko KHwah-maKHwah saDa kahiye

apna sar phoDta hai aap raqib

shauq se is ko mud-jhaDa kahiye

mare KHandon ke mard-e-adam ko

koi puchhe nahin hai kya kahiye

DaDhi mila ki go ki hai KHu-gir

par mahadew ki jaTa kahiye

jin ki hurmat pe kuchh nahin hai nigah

in ko pa-posh ka tala kahiye

chhupte phirte hain waqt-e-jang-o-jadal

buzdila un ko barmala kahiye

KHud-pasandi mein gharq hai aalam

'nayan' ko kis ko ab bura kahiye