wapas jo nahin aaega mein wo safari hun

vāpas jo nahīñ aa.egā meñ vo safarī huuñ

ai dost gale lag ki charāġh-e-saharī huuñ

ai husn ye andāz-o-adā tujh meñ kahāñ the

maiñ tere liye ā.īna-e-ishva-garī huuñ

baḌhtī huī tahrīk-e-siyāsat mujhe samjho

elān-e-baġhāvat pa.e bedād-garī huuñ

duniyā ke liye jo hai ujāloñ kā payambar

zulmat-kada-e-shab meñ vo najm-e-saharī huuñ

rangīnī-o-ḳhush-pairahnī hai mire dam se

gulshan meñ kalī tum meñ nasīm-e-saharī huuñ

hairat se na kyuuñ dekhe mujhe saarā zamāna

parvarda-e-āġhosh-e-kamāl-e-basharī huuñ

tum bhī ho adāoñ kī kashākash meñ giraftār

kyā fikr jo maiñ qaidī-e-āshufta-sarī huuñ

wapas jo nahin aaega mein wo safari hun

ai dost gale lag ki charagh-e-sahari hun

ai husn ye andaz-o-ada tujh mein kahan the

main tere liye aaina-e-ishwa-gari hun

baDhti hui tahrik-e-siyasat mujhe samjho

elan-e-baghawat pae bedad-gari hun

duniya ke liye jo hai ujalon ka payambar

zulmat-kada-e-shab mein wo najm-e-sahari hun

rangini-o-KHush-pairahni hai mere dam se

gulshan mein kali tum mein nasim-e-sahari hun

hairat se na kyun dekhe mujhe sara zamana

parwarda-e-aghosh-e-kamal-e-bashari hun

tum bhi ho adaon ki kashakash mein giraftar

kya fikr jo main qaidi-e-ashufta-sari hun