waqif nahin hai koi hasinon ki chaal se

vāqif nahīñ hai koī hasīnoñ kī chaal se

dil kā shikār karte haiñ zulfoñ ke jaal se

nāseh ḳhudā ke vāste zikr-e-sanam na kar

hotā hai ranj aur kisī ke ḳhayāl se

aa.egā baaz tū na 'adū se mile baġhair

zāhir ye ho rahā hai tirī chāl-Dhāl se

us ke liye jahān meñ lutf-e-hayāt kyā

māyūs ho gayā ho jo tere visāl se

ab raaz ham se khiñchne kā mā'lūm ho gayā

karte ho ḳhush 'adū ko hamāre malāl se

ye bhī hai ik salīqa-e-inkār dekhnā

chīñ-bar-jabīñ vo hote haiñ mere savāl se

achchhā ye 'ishq achchhī ye dil-bastagī huī

aaya huuñ tang roz ke ranj-o-malāl se

yuuñ to bashar ke vāste iksīr hai sharāb

piinā hai is kā shart magar e'tidāl se

dil meñ agar vo ḳhush hoñ to hairat kā hai maqām

zāhir meñ jo ḳhafā haiñ mirī ‘arz-e-hāl se

kyā kyā guzar chukī hai mire dil pe hijr meñ

vāqif nahīñ haiñ aap abhī mere haal se

'hājir' ke mo'taqid hoñ ye ham ko yaqīn hai

jā kar mileñ gar aap bhī us bā-kamāl se

waqif nahin hai koi hasinon ki chaal se

dil ka shikar karte hain zulfon ke jal se

naseh KHuda ke waste zikr-e-sanam na kar

hota hai ranj aur kisi ke KHayal se

aaega baz tu na 'adu se mile baghair

zahir ye ho raha hai teri chaal-Dhaal se

us ke liye jahan mein lutf-e-hayat kya

mayus ho gaya ho jo tere visal se

ab raaz hum se khinchne ka ma'lum ho gaya

karte ho KHush 'adu ko hamare malal se

ye bhi hai ek saliqa-e-inkar dekhna

chin-bar-jabin wo hote hain mere sawal se

achchha ye 'ishq achchhi ye dil-bastagi hui

aaya hun tang roz ke ranj-o-malal se

yun to bashar ke waste iksir hai sharab

pina hai is ka shart magar e'tidal se

dil mein agar wo KHush hon to hairat ka hai maqam

zahir mein jo KHafa hain meri ‘arz-e-haal se

kya kya guzar chuki hai mere dil pe hijr mein

waqif nahin hain aap abhi mere haal se

'hajir' ke mo'taqid hon ye hum ko yaqin hai

ja kar milen gar aap bhi us ba-kamal se