waraftagi ke sath muhaba bhi bahut hai

vāraftagī ke saath muhābā bhī bahut hai

iz.hār-e-ta.alluq bhī hai iḳhfā bhī bahut hai

jab niiñd ke surme ko taras jaatī haiñ āñkheñ

un rātoñ meñ ḳhvāboñ kī tamanna bhī bahut hai

vo ik varaq-e-sāda jo sauñp aa.e the tujh ko

us par tirī nam āñkhoñ kā imlā bhī bahut hai

āñkhoñ ke kaTore hoñ yā sāġhar hoñ laboñ ke

dil ḳhush ho to miTTī kā sakorā bhī bahut hai

inkār se zāhir hai ki samjhe to haiñ kuchh baat

jaanā ki ye jaanā to ye jaanā bhī bahut hai

vo nukta jise kahne kā yaarā nahīñ dil ko

us ke liye tahrīr kā parda bhī bahut hai

āvāzoñ ke amboh meñ ik lafz na paayā

yuuñ kahne ko ḳhush-vaqtī meñ paayā bhī bahut hai

kuchh un ko ta.ammul sā hai kuchh ham ko takalluf

ab ye bhī ta.alluq hai to itnā bhī bahut hai

jab shahr-e-tamannā meñ dar-o-bām hoñ ḳhāmosh

ehsās ko tanhā.ī kā sahrā bhī bahut hai

rū-gardāñ haiñ ab vo bhī to kyā shab na kaTegī

'tāriq' tumheñ to sub.h kā taarā bhī bahut hai

waraftagi ke sath muhaba bhi bahut hai

izhaar-e-talluq bhi hai iKHfa bhi bahut hai

jab nind ke surme ko taras jati hain aankhen

un raaton mein KHwabon ki tamanna bhi bahut hai

wo ek waraq-e-sada jo saunp aae the tujh ko

us par teri nam aankhon ka imla bhi bahut hai

aankhon ke kaTore hon ya saghar hon labon ke

dil KHush ho to miTTi ka sakora bhi bahut hai

inkar se zahir hai ki samjhe to hain kuchh baat

jaana ki ye jaana to ye jaana bhi bahut hai

wo nukta jise kahne ka yara nahin dil ko

us ke liye tahrir ka parda bhi bahut hai

aawazon ke amboh mein ek lafz na paya

yun kahne ko KHush-waqti mein paya bhi bahut hai

kuchh un ko tammul sa hai kuchh hum ko takalluf

ab ye bhi talluq hai to itna bhi bahut hai

jab shahr-e-tamanna mein dar-o-baam hon KHamosh

ehsas ko tanhai ka sahra bhi bahut hai

ru-gardan hain ab wo bhi to kya shab na kaTegi

'tariq' tumhein to subh ka tara bhi bahut hai