wafa hoti nahin hai bewafai ho nahin sakti

vafā hotī nahīñ hai bevafā.ī ho nahīñ saktī

kuchh aisī qaid hai jis se rihā.ī ho nahīñ saktī

faqat jī hī nahīñ jaañ kā ziyāñ bhī ‘ain-mumkin hai

ye kār-e-‘ishq hai is meñ kamā.ī ho nahīñ saktī

kabhī ḳhud se kabhī dīvār-o-dar se guftugū Thahrī

tumhāre sāmne to lab-kushā.ī ho nahīñ saktī

dil-e-shorīda-sar ke saath chalte haiñ muravvat meñ

purānā yaar hai be-e'tinā.ī ho nahīñ saktī

tamāshā kyā dikhā.eñ ham tujhe mismār jazboñ kā

ki shahr-e-dil hai aur is meñ khudā.ī ho nahīñ saktī

'munīr' ik 'umr jis ke naam ko vird-e-zabāñ rakkhā

ab us be-mehr kī ham se burā.ī ho nahīñ saktī

wafa hoti nahin hai bewafai ho nahin sakti

kuchh aisi qaid hai jis se rihai ho nahin sakti

faqat ji hi nahin jaan ka ziyan bhi ‘ain-mumkin hai

ye kar-e-‘ishq hai is mein kamai ho nahin sakti

kabhi KHud se kabhi diwar-o-dar se guftugu Thahri

tumhaare samne to lab-kushai ho nahin sakti

dil-e-shorida-sar ke sath chalte hain murawwat mein

purana yar hai be-e'tinai ho nahin sakti

tamasha kya dikhaen hum tujhe mismar jazbon ka

ki shahr-e-dil hai aur is mein khudai ho nahin sakti

'munir' ek 'umr jis ke nam ko wird-e-zaban rakkha

ab us be-mehr ki hum se burai ho nahin sakti