wafa ka naghma suna hi nahin hai tere baad

vafā kā naġhma sunā hī nahīñ hai tere baa'd

sukūn dil ko milā hī nahīñ hai tere baa'd

tire firāq ne baḳhshī laboñ ko mohr-e-sukūt

zabān naġhma-sarā hī nahīñ hai tere baa'd

qarār-e-jāñ na umangeñ na shādmānī-e-dil

koī asāsa bachā hī nahīñ hai tere baa'd

mire qarīb na jo aa sakā tire dam se

hujūm-e-ġham vo rukā hī nahīñ hai tere baa'd

tamām ḳhvāhisheñ gum zulmat-e-alam meñ huiiñ

charāġh-e-shauq jalā hī nahīñ hai tere baa'd

mohabbatoñ kā ḳhazāna kahāñ hai poshīda

koī surāġh milā hī nahīñ hai tere baa'd

jo TuuTī zabt kī maalā to merī palkoñ par

koī bhī motī rukā hī nahīñ hai tere baa'd

tirī talāsh meñ niklā to gum huā aisā

mujhe ḳhud apnā patā hī nahīñ hai tere baa'd

har ek lafz tirā vaqf thā 'sahar' ke liye

kisī ke lab pe du'ā hī nahīñ hai tere baa'd

wafa ka naghma suna hi nahin hai tere ba'd

sukun dil ko mila hi nahin hai tere ba'd

tere firaq ne baKHshi labon ko mohr-e-sukut

zaban naghma-sara hi nahin hai tere ba'd

qarar-e-jaan na umangen na shadmani-e-dil

koi asasa bacha hi nahin hai tere ba'd

mere qarib na jo aa saka tere dam se

hujum-e-gham wo ruka hi nahin hai tere ba'd

tamam KHwahishen gum zulmat-e-alam mein huin

charagh-e-shauq jala hi nahin hai tere ba'd

mohabbaton ka KHazana kahan hai poshida

koi suragh mila hi nahin hai tere ba'd

jo TuTi zabt ki mala to meri palkon par

koi bhi moti ruka hi nahin hai tere ba'd

teri talash mein nikla to gum hua aisa

mujhe KHud apna pata hi nahin hai tere ba'd

har ek lafz tera waqf tha 'sahar' ke liye

kisi ke lab pe du'a hi nahin hai tere ba'd