wafa ka zikr chale qurbaton ki baat chale

vafā kā zikr chale qurbatoñ kī baat chale

zahe-nasīb agar vo hamāre saath chale

jo ham ruke to shab-o-roz ruk ga.e yak dam

jo ham chale to zamāne hamāre saath chale

tirā ye lutf-o-karam to sabhī pe ho saaqī

ki mai-kade meñ kam-az-kam na zāt-pāt chale

karam kiyā hai usī ne ki zindagī bhar ham

ḳhizāñ mizāj bahāroñ ke saath saath chale

shab-e-siyāh ne māñgā jo raushnī kā ḳhirāj

jalā ke mish.al-e-jāñ ham junūñ-sifāt chale

likhī huī hai muqaddar meñ shab-navardī kyā

shikasta-pā tire kūche meñ saarī raat chale

sajā liyā shab-e-tanhā ko is tarah maiñ ne

kisī hasīn se farzī mukālamāt chale

ajab ye mausam-e-gul kā ḳhizāñ se rishta hai

hayāt-o-maut bhī hāthoñ meñ Daale haath chale

vo fāsloñ ke sabab duur ho ga.e 'ādil'

ki jin ke dam se hamāre muāmlāt chale

wafa ka zikr chale qurbaton ki baat chale

zahe-nasib agar wo hamare sath chale

jo hum ruke to shab-o-roz ruk gae yak dam

jo hum chale to zamane hamare sath chale

tera ye lutf-o-karam to sabhi pe ho saqi

ki mai-kade mein kam-az-kam na zat-pat chale

karam kiya hai usi ne ki zindagi bhar hum

KHizan mizaj bahaaron ke sath sath chale

shab-e-siyah ne manga jo raushni ka KHiraj

jala ke mishal-e-jaan hum junun-sifat chale

likhi hui hai muqaddar mein shab-nawardi kya

shikasta-pa tere kuche mein sari raat chale

saja liya shab-e-tanha ko is tarah main ne

kisi hasin se farzi mukalamat chale

ajab ye mausam-e-gul ka KHizan se rishta hai

hayat-o-maut bhi hathon mein Dale hath chale

wo faslon ke sabab dur ho gae 'adil'

ki jin ke dam se hamare muamlat chale