wafa KHulus mohabbat ki baat karte hue

vafā ḳhulūs mohabbat kī baat karte hue

maiñ thak chukā huuñ mire dostoñ se laḌte hue

vo ek giit jise khul ke maiñ ne gaayā thā

laraz rahā huuñ vahī giit aaj sunte hue

ye ḳhair-o-shar kī laḌā.ī ye raat din kā tazād

ai kaash dekhūñ kisī roz ḳhatm hote hue

use ḳhabar na thī miTTī use nigal legī

vo paanī ḳhush thā bahut pattharoñ pe bahte hue

magar na siikh sakā ḳhud ko bhūlne kā hunar

tamām umr gañvā dī kitāb paḌhte hue

vahī ilāqa añdheroñ kī dastaras meñ hai

sau āftāb jahāñ dekhe chalte phirte hue

wafa KHulus mohabbat ki baat karte hue

main thak chuka hun mere doston se laDte hue

wo ek git jise khul ke main ne gaya tha

laraz raha hun wahi git aaj sunte hue

ye KHair-o-shar ki laDai ye raat din ka tazad

ai kash dekhun kisi roz KHatm hote hue

use KHabar na thi miTTi use nigal legi

wo pani KHush tha bahut pattharon pe bahte hue

magar na sikh saka KHud ko bhulne ka hunar

tamam umr ganwa di kitab paDhte hue

wahi ilaqa andheron ki dastaras mein hai

sau aaftab jahan dekhe chalte phirte hue