wafa ki fasl phir bone chali hun

vafā kī fasl phir bone chalī huuñ

maiñ kyā pā.ūñgī bas khone chalī huuñ

junūñ kī had se bhī aage qadam hai

na jaane aur kyā hone chalī huuñ

ye mumkin to nazar aatā nahīñ hai

anā ko apnī maiñ dhone chalī huuñ

samundar aa gayā mere muqābil

jab us ne dekhā maiñ rone chalī huuñ

yahī nekī mujhe zinda rakhegī

ki bojh auroñ kā maiñ Dhone chalī huuñ

rahī huuñ muztarib ḳhud ko bhī pā kar

phir apne aap ko khone chalī huuñ

utar aa.ī hai yaad āñkhoñ meñ terī

maiñ tere vāste sone chalī huuñ

bahut hai bārish-e-ālām 'rūmī'

hifāzat ko kisī kone chalī huuñ

wafa ki fasl phir bone chali hun

main kya paungi bas khone chali hun

junun ki had se bhi aage qadam hai

na jaane aur kya hone chali hun

ye mumkin to nazar aata nahin hai

ana ko apni main dhone chali hun

samundar aa gaya mere muqabil

jab us ne dekha main rone chali hun

yahi neki mujhe zinda rakhegi

ki bojh auron ka main Dhone chali hun

rahi hun muztarib KHud ko bhi pa kar

phir apne aap ko khone chali hun

utar aai hai yaad aankhon mein teri

main tere waste sone chali hun

bahut hai barish-e-alam 'rumi'

hifazat ko kisi kone chali hun