wafa-koshi nahin jati sitam-rani nahin jati

vafā-koshī nahīñ jaatī sitam-rānī nahīñ jaatī

ye apnī apnī aadat hai ba-āsānī nahīñ jaatī

hijāboñ se haqīqat kī daraḳhshānī nahīñ jaatī

ki lau fānūs ke andar hai tābānī nahīñ jaatī

junūn-e-ishq kī ai dil farāvānī nahīñ jaatī

ki manzil sāmne hai aur pahchānī nahīñ jaatī

nahīñ jaatī hamārī ḳhāna-vīrānī nahīñ jaatī

ki sho.ale bujh chuke haiñ sho.ala-sāmānī nahīñ jaatī

tajāhul ārifāna un kā bazm-e-ġhair meñ tauba

ki pahchānī huī sūrat bhī pahchānī nahīñ jaatī

chaman meñ raat bhar go bāda-e-shabnam barastī hai

gul-o-bulbul kī phir bhī pāk-dāmanī nahīñ jaatī

kahāñ ham haiñ ki man-mānī tumhārī maan lete haiñ

hamārī mānñe kī baat bhī maanī nahīñ jaatī

nigāh-e-husn hī kuchh kaam kar jaa.e to mumkin hai

rafū karne se varna chāk-dāmānī nahīñ jaatī

muḳhālif kuchh kareñ urdu zabāñ miT hī nahīñ saktī

ki jab tak apnī mahfil se ġhazal-ḳhvānī nahīñ jaatī

mohabbat 'mauj' vo dariyā hai jis kī thaah mushkil hai

agar ik baar aa jaatī hai tuġhyānī nahīñ jaatī

wafa-koshi nahin jati sitam-rani nahin jati

ye apni apni aadat hai ba-asani nahin jati

hijabon se haqiqat ki daraKHshani nahin jati

ki lau fanus ke andar hai tabani nahin jati

junun-e-ishq ki ai dil farawani nahin jati

ki manzil samne hai aur pahchani nahin jati

nahin jati hamari KHana-virani nahin jati

ki shoale bujh chuke hain shoala-samani nahin jati

tajahul aarifana un ka bazm-e-ghair mein tauba

ki pahchani hui surat bhi pahchani nahin jati

chaman mein raat bhar go baada-e-shabnam barasti hai

gul-o-bulbul ki phir bhi pak-damani nahin jati

kahan hum hain ki man-mani tumhaari man lete hain

hamari manne ki baat bhi mani nahin jati

nigah-e-husn hi kuchh kaam kar jae to mumkin hai

rafu karne se warna chaak-damani nahin jati

muKHalif kuchh karen urdu zaban miT hi nahin sakti

ki jab tak apni mahfil se ghazal-KHwani nahin jati

mohabbat 'mauj' wo dariya hai jis ki thah mushkil hai

agar ek bar aa jati hai tughyani nahin jati