wafa-o-mehr-o-altaf-o-karam the ham-inan kya kya

vafā-o-mehr-o-altāf-o-karam the ham-ināñ kyā kyā

hue haiñ apne hī dil se magar ham bad-gumāñ kyā kyā

par-e-parvāz niilā āsmāñ manzil sitāroñ kī

kaTe shahpar to yaad aane lagīñ jaulāniyāñ kyā kyā

ye apnā dil jo ab āseb-e-ḳhāmoshī kā maskan hai

kabhī guzre the is suunī Dagar se kārvāñ kyā kyā

sukūt-e-nīm-shab kī āhaTeñ aur raat kā jaadū

ye manzar saath le aayā tirī dildāriyāñ kyā kyā

jahāñ ahl-e-nazar ahl-e-hunar kī hukmarānī thī

vahāñ minqār-e-zer-e-par haiñ baiThe nukta-dāñ kyā kyā

ab apne ghar kā bhī ahvāl lab par lā nahīñ sakte

kiyā karte the ham ahvāl-e-ālam kā bayāñ kyā kyā

ajab tīra-shabī se ab rah-o-rasm-e-junūñ Thahrī

hue nisyāñ ke parde meñ mah-o-anjum nihāñ kyā kyā

wafa-o-mehr-o-altaf-o-karam the ham-inan kya kya

hue hain apne hi dil se magar hum bad-guman kya kya

par-e-parwaz nila aasman manzil sitaron ki

kaTe shahpar to yaad aane lagin jaulaniyan kya kya

ye apna dil jo ab aaseb-e-KHamoshi ka maskan hai

kabhi guzre the is suni Dagar se karwan kya kya

sukut-e-nim-shab ki aahaTen aur raat ka jadu

ye manzar sath le aaya teri dildariyan kya kya

jahan ahl-e-nazar ahl-e-hunar ki hukmarani thi

wahan minqar-e-zer-e-par hain baiThe nukta-dan kya kya

ab apne ghar ka bhi ahwal lab par la nahin sakte

kiya karte the hum ahwal-e-alam ka bayan kya kya

ajab tira-shabi se ab rah-o-rasm-e-junun Thahri

hue nisyan ke parde mein mah-o-anjum nihan kya kya