wafur-e-hausla-e-arz-e-muddaa na raha

vafūr-e-hausla-e-arz-e-mudda.ā na rahā

milā jo us se to baaqī koī gila na rahā

ragoñ se dard kā rishta bhī ḳhaam hī niklā

kisī kī chashm-e-ināyat kā silsila na rahā

nikāl pheñk diyā dil se sab usūloñ ko

nazar ke sāmne jab koī rāsta na rahā

mire lahū se hī raushan charāġh thī hastī

mire hī ghar meñ agarche koī diyā na rahā

ajiib hai ki huā rū-siyah raqīb mirā

ajīb-tar hai ki vo shoḳh bā-vafā na rahā

talab meñ us kī farozāñ kiyā thā dil kā diyā

havā chalī to bahut der tak jalā na rahā

wafur-e-hausla-e-arz-e-muddaa na raha

mila jo us se to baqi koi gila na raha

ragon se dard ka rishta bhi KHam hi nikla

kisi ki chashm-e-inayat ka silsila na raha

nikal phenk diya dil se sab usulon ko

nazar ke samne jab koi rasta na raha

mere lahu se hi raushan charagh thi hasti

mere hi ghar mein agarche koi diya na raha

ajib hai ki hua ru-siyah raqib mera

ajib-tar hai ki wo shoKH ba-wafa na raha

talab mein us ki farozan kiya tha dil ka diya

hawa chali to bahut der tak jala na raha