wafur-e-shauq-e-jalwa mein dua ko bhul jate hain

vafūr-e-shauq-e-jalva meñ duā ko bhuul jaate haiñ

mohabbat karne vaale to ḳhudā ko bhuul jaate haiñ

usūloñ par jahāñ bhī maslahat tarjīh paatī hai

vahīñ ahl-e-ġharaz apnī vafā ko bhuul jaate haiñ

hazāroñ Thokareñ miltī haiñ ham ko dahr-e-fānī meñ

agar duniyā meñ ham terī razā ko bhuul jaate haiñ

mohabbat karne vaale to jahāñ meñ apne dilbar kī

vafā ko yaad rakhte haiñ jafā ko bhuul jaate haiñ

ḳhudā kā naam yuuñ rakhte to haiñ vird-e-zabāñ vaa.iz

tamāsha hai magar ahl-e-ḳhudā ko bhuul jaate haiñ

vafūr-e-zar vafūr-e-aish meñ to bārhā 'raushan'

bahut se log aise haiñ ḳhudā ko bhuul jaate haiñ

wafur-e-shauq-e-jalwa mein dua ko bhul jate hain

mohabbat karne wale to KHuda ko bhul jate hain

usulon par jahan bhi maslahat tarjih pati hai

wahin ahl-e-gharaz apni wafa ko bhul jate hain

hazaron Thokaren milti hain hum ko dahr-e-fani mein

agar duniya mein hum teri raza ko bhul jate hain

mohabbat karne wale to jahan mein apne dilbar ki

wafa ko yaad rakhte hain jafa ko bhul jate hain

KHuda ka nam yun rakhte to hain wird-e-zaban waiz

tamasha hai magar ahl-e-KHuda ko bhul jate hain

wafur-e-zar wafur-e-aish mein to barha 'raushan'

bahut se log aise hain KHuda ko bhul jate hain