wafur-e-sher hai aur raat hone wali hai

vafūr-e-sher hai aur raat hone vaalī hai

tū chāñd hai to mulāqāt hone vaalī hai

tumhārī baat ne dil kī ghaTā ko chheḌ diyā

hamārī āñkhoñ se barsāt hone vaalī hai

ye ek saath jo ḳhāmosh ho ga.e haiñ log

zarūr koī baḌī baat hone vaalī hai

har ek shaḳhs hī tesha uThā.e phirtā hai

butoñ kī shahr meñ bohtāt hone vaalī hai

vo apnī āñkhoñ meñ āyāt likh ke laayā hai

is ajnabī se mujhe maat hone vaalī hai

maiñ jāntā huuñ haqīqat savāng-e-mahshar kī

ye dil-lagī bhī mire saath hone vaalī hai

vo kār-e-ishq meñ bhī kāmyāb ho gayā hai

ab us ko lambī havālāt hone vaalī hai

hamāre zabt kī puḳhta-ravī se lagtā hai

kuchh aur talḳhī-e-auqāt hone vaalī hai

safar to hogā magar rāste nahīñ hoñge

ajiib sūrat-e-hālāt hone vaalī hai

wafur-e-sher hai aur raat hone wali hai

tu chand hai to mulaqat hone wali hai

tumhaari baat ne dil ki ghaTa ko chheD diya

hamari aankhon se barsat hone wali hai

ye ek sath jo KHamosh ho gae hain log

zarur koi baDi baat hone wali hai

har ek shaKHs hi tesha uThae phirta hai

buton ki shahr mein bohtat hone wali hai

wo apni aankhon mein aayat likh ke laya hai

is ajnabi se mujhe mat hone wali hai

main jaanta hun haqiqat sawang-e-mahshar ki

ye dil-lagi bhi mere sath hone wali hai

wo kar-e-ishq mein bhi kaamyab ho gaya hai

ab us ko lambi hawalat hone wali hai

hamare zabt ki puKHta-rawi se lagta hai

kuchh aur talKHi-e-auqat hone wali hai

safar to hoga magar raste nahin honge

ajib surat-e-haalat hone wali hai