wahan kaise koi diya jale jahan dur tak ye hawa na ho

vahāñ kaise koī diyā jale jahāñ duur tak ye havā na ho

unheñ hāl-e-dil na sunā.iye jinheñ dard-e-dil kā pata na ho

hoñ ajab tarah kī shikāyateñ hoñ ajab tarah kī ināyateñ

tujhe mujh se shikve hazār hoñ mujhe tujh se koī gila na ho

koī aisā sher bhī de ḳhudā jo tirī atā ho tirī atā

kabhī jaisā maiñ ne kahā na ho kabhī jaisā maiñ ne sunā na ho

na diye kā hai na havā kā hai yahāñ jo bhī kuchh hai ḳhudā kā hai

yahāñ aisā koī diyā nahīñ jo jalā ho aur vo bujhā na ho

maiñ marīz-e-ishq huuñ chāragar tū hai dard-e-ishq se be-ḳhabar

ye taḌap hī us kā ilaaj hai ye taḌap na ho to shifā na ho

wahan kaise koi diya jale jahan dur tak ye hawa na ho

unhen haal-e-dil na sunaiye jinhen dard-e-dil ka pata na ho

hon ajab tarah ki shikayaten hon ajab tarah ki inayaten

tujhe mujh se shikwe hazar hon mujhe tujh se koi gila na ho

koi aisa sher bhi de KHuda jo teri ata ho teri ata

kabhi jaisa main ne kaha na ho kabhi jaisa main ne suna na ho

na diye ka hai na hawa ka hai yahan jo bhi kuchh hai KHuda ka hai

yahan aisa koi diya nahin jo jala ho aur wo bujha na ho

main mariz-e-ishq hun chaaragar tu hai dard-e-ishq se be-KHabar

ye taDap hi us ka ilaj hai ye taDap na ho to shifa na ho