wahi andaz-e-jahan-e-guzaran hai ki jo tha

vahī andāz-e-jahān-e-guzarāñ hai ki jo thā

in nigāhoñ se vahī raaz ayaañ hai ki jo thā

vahī rindoñ kī siyah-noshī-e-durd-e-tah-e-jām

vahī nazzāra sar-e-kū-e-muġhāñ hai ki jo thā

haa.e us kaif-e-nuḳhustīñ kī ḳhumār-angezī

tirī āñkhoñ meñ vahī ḳhvāb javāñ hai ki jo thā

vahī tarġhīb-e-tamanna kī chaman-ārā.ī

aur pahlū meñ vahī qalb-e-tapāñ hai ki jo thā

lazzat-e-shauq kā anfās meñ nam baaqī hai

mire siine meñ vahī soz-e-nihāñ hai ki jo thā

inqilābāt abhī gardish-e-ayyām meñ haiñ

tire jalvoñ meñ vahī sahr-e-ravāñ hai ki jo thā

zauq-e-vārafta kī asnām-garī miT na sakī

hā.il-e-rāh vahī sang-e-girāñ hai ki jo thā

vahī āshufta-nigāhī vahī sahrā-talabī

vahī ik ma.arka-e-sūd-o-ziyāñ hai ki jo thā

wahi andaz-e-jahan-e-guzaran hai ki jo tha

in nigahon se wahi raaz ayan hai ki jo tha

wahi rindon ki siyah-noshi-e-durd-e-tah-e-jam

wahi nazzara sar-e-ku-e-mughan hai ki jo tha

hae us kaif-e-nuKHustin ki KHumar-angezi

teri aankhon mein wahi KHwab jawan hai ki jo tha

wahi targhib-e-tamanna ki chaman-arai

aur pahlu mein wahi qalb-e-tapan hai ki jo tha

lazzat-e-shauq ka anfas mein nam baqi hai

mere sine mein wahi soz-e-nihan hai ki jo tha

inqilabaat abhi gardish-e-ayyam mein hain

tere jalwon mein wahi sahr-e-rawan hai ki jo tha

zauq-e-warafta ki asnam-gari miT na saki

hail-e-rah wahi sang-e-giran hai ki jo tha

wahi aashufta-nigahi wahi sahra-talabi

wahi ek marka-e-sud-o-ziyan hai ki jo tha