wahi gesuon ki uDan hai wahi aarizon ka nikhaar hai

vahī gesuoñ kī uḌaan hai vahī ārizoñ kā nikhār hai

ye kisī kī shān-e-varūd hai ki mirī nazar kā vaqār hai

tirī ḳhud-pasand navāzisheñ mirā jī lubhā ke guzar ga.iiñ

magar uf ye dīda-e-mutma.in jo gadā-e-rāh-guzār hai

abhī koñpaloñ meñ vo ras kahāñ jo guloñ kā ruup badal sake

abhī gul-farosh ke haath se hameñ ehtiyāj-e-bahār hai

mirī sādgī ke ḳhulūs ne tujhe baḳhsh dī vo barahnagī

jo nafas nafas kī hai tishnagī jo nazar nazar kī pukār hai

yahī dil-fareb tajalliyāñ mujhe do-jahāñ se aziiz huuñ

magar ai jamāl-e-sahar-numā mirā ghar jo tīra-o-tār hai

ġham-e-zāt se mirī zindagī ġham-e-kā.enāt meñ Dhal ga.ī

kisī bazm-e-nāz meñ kho ke bhī mujhe kā.enāt se pyaar hai

wahi gesuon ki uDan hai wahi aarizon ka nikhaar hai

ye kisi ki shan-e-warud hai ki meri nazar ka waqar hai

teri KHud-pasand nawazishen mera ji lubha ke guzar gain

magar uf ye dida-e-mutmain jo gada-e-rah-guzar hai

abhi konpalon mein wo ras kahan jo gulon ka rup badal sake

abhi gul-farosh ke hath se hamein ehtiyaj-e-bahaar hai

meri sadgi ke KHulus ne tujhe baKHsh di wo barahnagi

jo nafas nafas ki hai tishnagi jo nazar nazar ki pukar hai

yahi dil-fareb tajalliyan mujhe do-jahan se aziz hun

magar ai jamal-e-sahar-numa mera ghar jo tira-o-tar hai

gham-e-zat se meri zindagi gham-e-kaenat mein Dhal gai

kisi bazm-e-naz mein kho ke bhi mujhe kaenat se pyar hai