wahi hai aankhon mein KHwab rang-e-malal jaisa

vahī hai āñkhoñ meñ ḳhvāb rang-e-malāl jaisā

diloñ meñ duurī kā baab shīshe meñ baal jaisā

rukī huī āhaToñ se aage koī zamāna

khile hue phuul kī suhānī misāl jaisā

bahut hī pyārā thā us kā inkār bhī ki ab tak

nasha hai un ḳhaam sā.atoñ kā visāl jaisā

bahut purānī rutoñ kā ġham phir diye jalā.e

mile kahīñ jab koī tire ḳhadd-o-ḳhāl jaisā

vo maiñ thā yā koī vahm saaya sā chal rahā thā

lipaT gayā dil se ḳhauf makḌī ke jaal jaisā

utaar mere lahū meñ sachchā.iyoñ kā sahrā

khilā gulāb us meñ phir mohammad kī aal jaisā

wahi hai aankhon mein KHwab rang-e-malal jaisa

dilon mein duri ka bab shishe mein baal jaisa

ruki hui aahaTon se aage koi zamana

khile hue phul ki suhani misal jaisa

bahut hi pyara tha us ka inkar bhi ki ab tak

nasha hai un KHam saaton ka visal jaisa

bahut purani ruton ka gham phir diye jalae

mile kahin jab koi tere KHadd-o-KHal jaisa

wo main tha ya koi wahm saya sa chal raha tha

lipaT gaya dil se KHauf makDi ke jal jaisa

utar mere lahu mein sachchaiyon ka sahra

khila gulab us mein phir mohammad ki aal jaisa