wahi hai gardish-e-dauran wahi lail-o-nahaar ab bhi

vahī hai gardish-e-daurāñ vahī lail-o-nahār ab bhī

rahā kartā hai roz-o-shab kisī kā intizār ab bhī

kabhī din bhar tirī bāteñ kabhī yādoñ bharī rāteñ

tirī furqat meñ jiine ke bahāne haiñ hazār ab bhī

tirā jalva jo pā jaatī chaman meñ jā ke iThlātī

bhikāran ban ke baiThī hai tire dar par bahār ab bhī

ḳhushī har-chand hai taarī ga.ī ġham kī girāñ-bārī

chhalak jaatī haiñ āñkheñ ādatan be-iḳhtiyār ab bhī

hue haiñ muntashir varna sitamgar tum se kyā Darnā

hamārī Thokaroñ meñ hai tumhārā eqtidār ab bhī

agar 'aḳhlāq' se milte mohabbat ke chaman khilte

na bantī bazm-e-yārāñ ek gāh-e-kār-zār ab bhī

wahi hai gardish-e-dauran wahi lail-o-nahaar ab bhi

raha karta hai roz-o-shab kisi ka intizar ab bhi

kabhi din bhar teri baaten kabhi yaadon bhari raaten

teri furqat mein jine ke bahane hain hazar ab bhi

tera jalwa jo pa jati chaman mein ja ke iThlati

bhikaran ban ke baiThi hai tere dar par bahaar ab bhi

KHushi har-chand hai tari gai gham ki giran-bari

chhalak jati hain aankhen aadatan be-iKHtiyar ab bhi

hue hain muntashir warna sitamgar tum se kya Darna

hamari Thokaron mein hai tumhaara eqtidar ab bhi

agar 'aKHlaq' se milte mohabbat ke chaman khilte

na banti bazm-e-yaran ek gah-e-kar-zar ab bhi