wahi KHaraba-e-imkan wahi sifal-e-qadim

vahī ḳharāba-e-imkāñ vahī sifāl-e-qadīm

humak rahā hai kahīñ dil meñ ik ḳhayāl-e-qadīm

khaḌā huuñ jaise abhī tak azal ke ziine par

nazar meñ hai vahī nazzāra-e-jamāl-e-qadīm

firāq-rāt meñ zinda rahe ki zinda thī

hamārī ruuh meñ sarshāri-e-visāl-e-qadīm

mirā vajūd havāla tirā huā āḳhir

to khā gayā nā mujhe tū mire savāl-e-qadīm

ye habs-e-vaqt ye lā-intihā ghuTan kī ruteñ

baras ke khul bhī kabhī abr-e-ehtimāl-e-qadīm

'sa.īd' kahne ko kyā kuchh badal gayā lekin

vahī hai tū vahī zindān-e-māh-o-sāl-e-qadīm

wahi KHaraba-e-imkan wahi sifal-e-qadim

humak raha hai kahin dil mein ek KHayal-e-qadim

khaDa hun jaise abhi tak azal ke zine par

nazar mein hai wahi nazzara-e-jamal-e-qadim

firaq-raat mein zinda rahe ki zinda thi

hamari ruh mein sarshaari-e-visal-e-qadim

mera wajud hawala tera hua aaKHir

to kha gaya na mujhe tu mere sawal-e-qadim

ye habs-e-waqt ye la-intiha ghuTan ki ruten

baras ke khul bhi kabhi abr-e-ehtimal-e-qadim

'said' kahne ko kya kuchh badal gaya lekin

wahi hai tu wahi zindan-e-mah-o-sal-e-qadim