wahi kuchh zindagi mein zindagi ka bhed pate hain

vahī kuchh zindagī meñ zindagī kā bhed paate haiñ

jo paiham justujū karte haiñ barsoñ ġham uThāte haiñ

jo sach pūchho to ḳhud jiite haiñ aur jiinā sikhāte haiñ

vo dīvāne jo har tūfān-e-ġham meñ muskurāte haiñ

kuchh is andāz se vo apnī mahfil meñ bulāte haiñ

ki insāñ ke qadam uThne se pahle kaañp jaate haiñ

vo pichhlī shab ko apne ruḳh se jab pardā uThāte haiñ

mirā ehsās shāhid hai do-ālam jhuum jaate haiñ

ta.ajjub kyoñ hai merī be-ḳhudī par ahl-e-mahshar ko

vo jis ko bhī pilāte haiñ kuchh aisī hī pilāte haiñ

nahīñ kuchh ḳhāk-e-dil lekin pahuñch kar un ke dāman tak

yahī zarre mah-o-ḳhurshīd ban kar jagmagāte haiñ

mohabbat ibtidā tā-intihā irfān-e-kāmil hai

magar ham to unheñ paane se pahle kho.e jaate haiñ

tirā kūcha hī kyoñ rah rah ke paiham yaad aatā hai

isī aalam meñ aalam aur bhī to paa.e jaate haiñ

shikāyat kar rahe ho 'kaif' tum ko shukr lāzim hai

vo mushkil se kisī ko apnā dīvāna banāte haiñ

wahi kuchh zindagi mein zindagi ka bhed pate hain

jo paiham justuju karte hain barson gham uThate hain

jo sach puchho to KHud jite hain aur jina sikhate hain

wo diwane jo har tufan-e-gham mein muskuraate hain

kuchh is andaz se wo apni mahfil mein bulate hain

ki insan ke qadam uThne se pahle kanp jate hain

wo pichhli shab ko apne ruKH se jab parda uThate hain

mera ehsas shahid hai do-alam jhum jate hain

tajjub kyon hai meri be-KHudi par ahl-e-mahshar ko

wo jis ko bhi pilate hain kuchh aisi hi pilate hain

nahin kuchh KHak-e-dil lekin pahunch kar un ke daman tak

yahi zarre mah-o-KHurshid ban kar jagmagate hain

mohabbat ibtida ta-intiha irfan-e-kaamil hai

magar hum to unhen pane se pahle khoe jate hain

tera kucha hi kyon rah rah ke paiham yaad aata hai

isi aalam mein aalam aur bhi to pae jate hain

shikayat kar rahe ho 'kaif' tum ko shukr lazim hai

wo mushkil se kisi ko apna diwana banate hain