wahi talluq-e-KHatir jo barq-o-baad mein hai

vahī ta.alluq-e-ḳhātir jo barq-o-bād meñ hai

dil-e-sitam-zada kī hasrat-o-murād meñ hai

har ek ahd kī hotī hai ik ḳhusūsiyyat

hamāre daur meñ yaksāniyat tazād meñ hai

kisī natīje pe pahuñche haiñ ġhaur-o-fikr ke ba.ad

to ye ki saarā jahāñ ek gard-bād meñ hai

agar nazar ho to paḌh lo payām-e-bedārī

fasīl-e-shahr pe likkhā huā fasād meñ hai

vo baat saarī kitāboñ meñ mil nahīñ saktī

jo inqalāb ke chhoTe se istinād meñ hai

vahī asās-e-mohabbat bhī hai aqīdat bhī

vo e'timād kā pahlū jo e'tiqād meñ hai

vahī to fan meñ rivāyat kī ruuh hai 'āzar'

vo ek chhoTā sā nukta jo ijtihād meñ hai

wahi talluq-e-KHatir jo barq-o-baad mein hai

dil-e-sitam-zada ki hasrat-o-murad mein hai

har ek ahd ki hoti hai ek KHususiyyat

hamare daur mein yaksaniyat tazad mein hai

kisi natije pe pahunche hain ghaur-o-fikr ke baad

to ye ki sara jahan ek gard-baad mein hai

agar nazar ho to paDh lo payam-e-bedari

fasil-e-shahr pe likkha hua fasad mein hai

wo baat sari kitabon mein mil nahin sakti

jo inqalab ke chhoTe se istinad mein hai

wahi asas-e-mohabbat bhi hai aqidat bhi

wo e'timad ka pahlu jo e'tiqad mein hai

wahi to fan mein riwayat ki ruh hai 'azar'

wo ek chhoTa sa nukta jo ijtihad mein hai