wahi the jo apni justuju mein khare nahin the

vahī the jo apnī justujū meñ khare nahīñ the

vagarna ham un kī dastaras se pare nahīñ the

tabhī vo samjhe ki ham khilaune nahīñ haiñ jab ham

vahāñ se un ko mile jahāñ par dhare nahīñ the

daraḳht phir se harā phaloñ se bharā huā hai

magar vo patte bahār meñ jo hare nahīñ the

us ek lamhe kā rañg umroñ pe chhā gayā hai

vo ek lamha ki rañg jis meñ bhare nahīñ the

ajab sā ik ḳhvāb dekh kar aañkh khul ga.ī hai

ham apne marne pe ro.e lekin mare nahīñ the

ḳhud apne hone ke ḳhauf meñ ab jo mubtalā haiñ

ḳhudā ke hone se bhī vo pahle Dare nahīñ the

ye kaisī kaayā palaT hai shah maat de rahe haiñ

vo jin se shatranj ke piyāde mare nahīñ the

hameñ zamāne ne kīmiyā-gar banā diyā hai

janam se ham log yuuñ nahīñ the are nahīñ the

wahi the jo apni justuju mein khare nahin the

wagarna hum un ki dastaras se pare nahin the

tabhi wo samjhe ki hum khilaune nahin hain jab hum

wahan se un ko mile jahan par dhare nahin the

daraKHt phir se hara phalon se bhara hua hai

magar wo patte bahaar mein jo hare nahin the

us ek lamhe ka rang umron pe chha gaya hai

wo ek lamha ki rang jis mein bhare nahin the

ajab sa ek KHwab dekh kar aankh khul gai hai

hum apne marne pe roe lekin mare nahin the

KHud apne hone ke KHauf mein ab jo mubtala hain

KHuda ke hone se bhi wo pahle Dare nahin the

ye kaisi kaya palaT hai shah mat de rahe hain

wo jin se shatranj ke piyaade mare nahin the

hamein zamane ne kimiya-gar bana diya hai

janam se hum log yun nahin the are nahin the