wahi umid wahi intizar le aai

vahī umiid vahī intizār le aa.ī

na.ī havā bhī purānā ġhubār le aa.ī

kisī se le liye manzar kisī se bīnā.ī

kisī se zindagī āñkheñ udhār le aa.ī

chalo yahāñ se ki sahrā kī ḳhaak bhī āḳhir

tamām shahr ke naqsh-o-nigār le aa.ī

tirī talāsh meñ ḳhud ko vahāñ talak laayā

jahāñ talak bhī tirī rahguzār le aa.ī

shab-e-guzishta mujhe ik ḳhafīf sī aahaT

kisī ḳhayāl kī naddī ke paar le aa.ī

jahāñ kī dhuup se kuchh aur na ho sakā lekin

abhī se bāloñ meñ chāñdī ke taar le aa.ī

wahi umid wahi intizar le aai

nai hawa bhi purana ghubar le aai

kisi se le liye manzar kisi se binai

kisi se zindagi aankhen udhaar le aai

chalo yahan se ki sahra ki KHak bhi aaKHir

tamam shahr ke naqsh-o-nigar le aai

teri talash mein KHud ko wahan talak laya

jahan talak bhi teri rahguzar le aai

shab-e-guzishta mujhe ek KHafif si aahaT

kisi KHayal ki naddi ke par le aai

jahan ki dhup se kuchh aur na ho saka lekin

abhi se baalon mein chandi ke tar le aai