wahi zid un ko hai wahi hai haT

vahī zid un ko hai vahī hai haT

un kī chāhī nahīñ hai ye jhanjhaT

paañv kī mere jo sunī aahaT

hue dāḳhil makān meñ jhaT-paT

shoḳh kitnā kiyā hai pīr-e-muġhāñ

muġhbache ho ga.e baḌ muñh-phaT

koī pahlū nazar nahīñ aatā

dekhiye baiThe uuñT kis karvaT

yaad karte nahīñ kabhī vo hameñ

naam kī un ke haañ lagī hai raT

zeb-e-mahfil hai māh-ruḳh merā

har taraf hai sitāroñ kā jhurmuT

jalva-gah meñ ajab karishma hai

yaad karte hī aa ga.e jhaT-paT

jalva-farmā vo gul hai gulshan meñ

har ravish par lage hue haiñ ThaT

in ko parde meñ bhī hijāb rahā

hai numāyāñ naqāb meñ ghuñghaT

nāla-e-dil charāġh-e-raushan hai

koh-e-ātish-fashāñ kī hai ye lipaT

bāda-e-nāb qismat-e-aġhyār

'sāqī'-e-zār ko mile talchhaT

wahi zid un ko hai wahi hai haT

un ki chahi nahin hai ye jhanjhaT

panw ki mere jo suni aahaT

hue daKHil makan mein jhaT-paT

shoKH kitna kiya hai pir-e-mughan

mughbache ho gae baD munh-phaT

koi pahlu nazar nahin aata

dekhiye baiThe unT kis karwaT

yaad karte nahin kabhi wo hamein

nam ki un ke han lagi hai raT

zeb-e-mahfil hai mah-ruKH mera

har taraf hai sitaron ka jhurmuT

jalwa-gah mein ajab karishma hai

yaad karte hi aa gae jhaT-paT

jalwa-farma wo gul hai gulshan mein

har rawish par lage hue hain ThaT

in ko parde mein bhi hijab raha

hai numayan naqab mein ghunghaT

nala-e-dil charagh-e-raushan hai

koh-e-atish-fashan ki hai ye lipaT

baada-e-nab qismat-e-aghyar

'saqi'-e-zar ko mile talchhaT