wahin ji uThte hain murde ye kya Thokar se chhuna hai

vahīñ jī uThte haiñ murde ye kyā Thokar se chhūnā hai

vo raftār aur vo qāmat qayāmat kā namūna hai

ghuTā aatā hai dam ye ishq ne ātish hai sulgā.ī

dil-e-sozāñ se yā qismat dhuāñ āñkhoñ kā duunā hai

are o ḳhāna-ābād itnī ḳhūñ-rezī ye qattālī

ki ek āshiq nahīñ kūcha tirā vīrān suunā hai

kabāb-e-dil agarche soḳhta hai chakh to ai kaifī

ye añgāroñ par āh-e-ātishīñ ne ḳhuub bhūnā hai

mubassir jauhar-e-ḳhat par kahīñ haiñ us ke abrū ko

surūhī koī hai be-kal ki jis kā ab ye kuunā hai

tilism ik husn ḳhalq-allah ke aalam kā dil pe hai

phiro irān-o-turkistān faringistāñ-o-yūnā hai

hamāre āh-e-tīr-e-be-kamāñ ne ḳhāna-e-dil se

ye ruḳh pherā ki tā-bām-e-falak bāñdhā sutūnā hai

jahāñ ahl-e-vara.a majlis meñ hoñ vo baḳhsh lene ko

nishāñ naqsh-e-danī kā saath ik laḌkā jamūnā hai

agar tasvīr-e-rañg-e-zard-e-āshiq ḳhūb-rū dekheñ

koī batlā.egā suunā ghar kā koī kuunā hai

diyā maiñ paan use ik reḳhta paḌh kar lagā kahne

ye iiñTī khuuī kā katthā hai aur kañkar kā chūnā hai

tujhe detā hai baazī ai 'muhib' bach jā.iyo us se

ki naT-khaT us ke yaar aur vo daġhābāz ek ghūnā hai

wahin ji uThte hain murde ye kya Thokar se chhuna hai

wo raftar aur wo qamat qayamat ka namuna hai

ghuTa aata hai dam ye ishq ne aatish hai sulgai

dil-e-sozan se ya qismat dhuan aankhon ka duna hai

are o KHana-abaad itni KHun-rezi ye qattali

ki ek aashiq nahin kucha tera viran suna hai

kabab-e-dil agarche soKHta hai chakh to ai kaifi

ye angaron par aah-e-atishin ne KHub bhuna hai

mubassir jauhar-e-KHat par kahin hain us ke abru ko

suruhi koi hai be-kal ki jis ka ab ye kuna hai

tilism ek husn KHalq-allah ke aalam ka dil pe hai

phiro iran-o-turkistan faringistan-o-yuna hai

hamare aah-e-tir-e-be-kaman ne KHana-e-dil se

ye ruKH phera ki ta-baam-e-falak bandha sutuna hai

jahan ahl-e-wara majlis mein hon wo baKHsh lene ko

nishan naqsh-e-dani ka sath ek laDka jamuna hai

agar taswir-e-rang-e-zard-e-ashiq KHub-ru dekhen

koi batlaega suna ghar ka koi kuna hai

diya main pan use ek reKHta paDh kar laga kahne

ye inTi khui ka kattha hai aur kankar ka chuna hai

tujhe deta hai bazi ai 'muhib' bach jaiyo us se

ki naT-khaT us ke yar aur wo daghabaz ek ghuna hai