wahshat-e-dil ne kahin ka bhi na rakkha mujhko

vahshat-e-dil ne kahīñ kā bhī na rakkhā mujh ko

dekhnā hai abhī kyā kahtī hai duniyā mujh ko

asar-e-qaid-e-ta.ayyun se bhī āzād hai dil

kis tarah band-e-alā.eq ho gavārā mujh ko

lene bhī de abhī mauj lab-e-sāhil ke maze

kyuuñ Dubotī hai ubharne kī tamannā mujh ko

ḳhvāhish-e-dil thī ki miltā kahīñ saudā-e-junūñ

maiñ ne kyā māñgā thā qismat ne diyā kyā mujh ko

terī be-pardagī-e-husn ne āñkheñ kholīñ

tañg-dāmānī-e-nazzāra thī pardā mujh ko

āḳhirī daur meñ mad.hosh huā thā lekin

laġhzish-e-pā ne mirī ḳhuub sambhālā mujh ko

umr saarī to kaTī dair-o-haram meñ ai 'shauq'

is pe sajda bhī to karnā nahīñ aayā mujh ko

wahshat-e-dil ne kahin ka bhi na rakkha mujh ko

dekhna hai abhi kya kahti hai duniya mujh ko

asar-e-qaid-e-tayyun se bhi aazad hai dil

kis tarah band-e-alaeq ho gawara mujh ko

lene bhi de abhi mauj lab-e-sahil ke maze

kyun Duboti hai ubharne ki tamanna mujh ko

KHwahish-e-dil thi ki milta kahin sauda-e-junun

main ne kya manga tha qismat ne diya kya mujh ko

teri be-pardagi-e-husn ne aankhen kholin

tang-damani-e-nazzara thi parda mujh ko

aaKHiri daur mein madhosh hua tha lekin

laghzish-e-pa ne meri KHub sambhaala mujh ko

umr sari to kaTi dair-o-haram mein ai 'shauq'

is pe sajda bhi to karna nahin aaya mujh ko