wahshat ki baat ho to bila-shak farid hain

vahshat kī baat ho to bilā-shak farīd haiñ

par ishq meñ to qais jī mere murīd haiñ

nafrat ke bīhaḌoñ ko hamāre lahū se sīñch

ham log jang-e-ishq ke antim shahīd haiñ

in kā mutāle’a hai miyāñ shart-e-dīn-e-ishq

ye hoñToñ ke nishān kalām-e-majīd haiñ

mujh ko yaqīñ dilānā hai to ruuh ban ke mil

ye husn-o-jism ishq kī kachchī rasīd haiñ

kyā hai koī umiid ki ham ko pata chale

ham log ek umr se kyoñ nā-umīd haiñ

ham aane vaalī nasl ko deñge shadīd pyaas

ham log zer-e-bai'at-e-fikr-e-yazīd haiñ

wahshat ki baat ho to bila-shak farid hain

par ishq mein to qais ji mere murid hain

nafrat ke bihaDon ko hamare lahu se sinch

hum log jang-e-ishq ke antim shahid hain

in ka mutale’a hai miyan shart-e-din-e-ishq

ye honTon ke nishan kalam-e-majid hain

mujh ko yaqin dilana hai to ruh ban ke mil

ye husn-o-jism ishq ki kachchi rasid hain

kya hai koi umid ki hum ko pata chale

hum log ek umr se kyon na-umid hain

hum aane wali nasl ko denge shadid pyas

hum log zer-e-bai'at-e-fikr-e-yazid hain