waise to be-shumar hain qamat-kashida log

vaise to be-shumār haiñ qāmat-kashīda log

gintī huī to rah ga.e bas chīda chīda log

dastār ke husūl kā koī to ho javāz

kis zo.am meñ haiñ mubtalā ye sar-burīda log

ai kaash apnī maut hī marte to thā mazā

jaañ se guzar ga.e haiñ jo mardum-gazīda log

koī to pushtī-bān hai un kā yahīñ kahīñ

kab baiThte haiñ chain se dāman-darīda log

khīñchegī tuul kab talak mohlat milī huī

fir.aun ban ga.e haiñ tire āfrīda log

'parvāz' jin kī diid ko āñkheñ taras ga.iiñ

laa.eñ kahāñ se DhūñD ke aise chunīda log

waise to be-shumar hain qamat-kashida log

ginti hui to rah gae bas chida chida log

dastar ke husul ka koi to ho jawaz

kis zoam mein hain mubtala ye sar-burida log

ai kash apni maut hi marte to tha maza

jaan se guzar gae hain jo mardum-gazida log

koi to pushti-ban hai un ka yahin kahin

kab baiThte hain chain se daman-darida log

khinchegi tul kab talak mohlat mili hui

firaun ban gae hain tere aafrida log

'parwaz' jin ki did ko aankhen taras gain

laen kahan se DhunD ke aise chunida log