waise to ek dusre ki sab sunte hain

vaise to ik dūsre kī sab sunte haiñ

jin ko sunānā chāhtā huuñ kab sunte haiñ

ab bhī vahī din raat haiñ lekin farq ye hai

pahle bolā karte the ab sunte haiñ

shak apnī hī zaat pe hone lagtā hai

apnī bāteñ dūsroñ se jab sunte haiñ

mahfil meñ jin ko sunñe kī taab na thī

vo bāteñ tanhā.ī meñ ab sunte haiñ

jiinā ham ko vaise bhī kab aatā thā

badal ga.e haiñ jiine ke Dhab sunte haiñ

āñkheñ chhū kar dekhtī haiñ āvāzoñ ko

kaan duhā.ī dete haiñ lab sunte haiñ

sunte zarūr haiñ duniyā vaale bhī 'shahzād'

kahne kī ḳhvāhish na rahe tab sunte haiñ

waise to ek dusre ki sab sunte hain

jin ko sunana chahta hun kab sunte hain

ab bhi wahi din raat hain lekin farq ye hai

pahle bola karte the ab sunte hain

shak apni hi zat pe hone lagta hai

apni baaten dusron se jab sunte hain

mahfil mein jin ko sunne ki tab na thi

wo baaten tanhai mein ab sunte hain

jina hum ko waise bhi kab aata tha

badal gae hain jine ke Dhab sunte hain

aankhen chhu kar dekhti hain aawazon ko

kan duhai dete hain lab sunte hain

sunte zarur hain duniya wale bhi 'shahzad'

kahne ki KHwahish na rahe tab sunte hain