waise to is ghar ko usne chahe kam KHush-haali di

vaise to is ghar ko us ne chāhe kam ḳhush-hālī dī

beTā bar-ḳhurdār diyā aur beTī hausle vaalī dī

ġhusse meñ donoñ ne ik duuje ke haath ko jhaTkā thā

aur ab soch rahe haiñ pahle kis ne kis ko gaalī dī

kuchh maiñ ḳhud bhī har ik shaḳhs kī bātoñ meñ aa jaatā huuñ

kuchh vaise bhī us ne mujh ko sūrat bholī-bhālī dī

varna kaam thā merā to phūloñ se rizq kamāne tak

phir us ne ik baaġh kī mere hāthoñ meñ rakhvālī dī

dhuup baḌhī to vo bhī apne apne paañv khīñch ga.e

maiñ ne apne hisse kī jin peḌoñ ko hariyālī dī

dil ne merī ek sadā par donoñ hāthoñ daan kiyā

jab zambīl mohabbat ne jazbāt se mujh ko ḳhālī dī

tū bhī maan gayā ai dost ki dariyā sirf Dubotā hai

mere baare meñ duniyā ne tujh ko ḳhām-ḳhayālī dī

pahle merī āñkhoñ se sarmāya chhīnā nīñdoñ kā

badle meñ phir hijr ne merī āñkhoñ ko ye laalī dī

vo hī degā mujh ko phir ta.amīr uThāne kī himmat

jis ne 'hasan' in bām-o-dar ko itnī ḳhasta-hālī dī

waise to is ghar ko us ne chahe kam KHush-haali di

beTa bar-KHurdar diya aur beTi hausle wali di

ghusse mein donon ne ek duje ke hath ko jhaTka tha

aur ab soch rahe hain pahle kis ne kis ko gali di

kuchh main KHud bhi har ek shaKHs ki baaton mein aa jata hun

kuchh waise bhi us ne mujh ko surat bholi-bhaali di

warna kaam tha mera to phulon se rizq kamane tak

phir us ne ek bagh ki mere hathon mein rakhwali di

dhup baDhi to wo bhi apne apne panw khinch gae

main ne apne hisse ki jin peDon ko hariyali di

dil ne meri ek sada par donon hathon dan kiya

jab zambil mohabbat ne jazbaat se mujh ko KHali di

tu bhi man gaya ai dost ki dariya sirf Dubota hai

mere bare mein duniya ne tujh ko KHam-KHayali di

pahle meri aankhon se sarmaya chhina nindon ka

badle mein phir hijr ne meri aankhon ko ye lali di

wo hi dega mujh ko phir tamir uThane ki himmat

jis ne 'hasan' in baam-o-dar ko itni KHasta-haali di