wajud ko jigar-e-motabar banate hain

vajūd ko jigar-e-mo'tabar banāte haiñ

alam pe haath to nezoñ pe sar banāte haiñ

chaman bhī ho koī amboh-e-ḳhār-o-ḳhas jaise

ye kār-ḳhāne to barg o samar banāte haiñ

havā kā tabsira ye sākinān-e-shahr pe thā

ajiib log haiñ paanī pe ghar banāte haiñ

qarīn-e-aql hai kyā koī sochtā hī nahīñ

ḳhabar uḌāne se pahle ḳhabar banāte haiñ

nahīñ ye shart ki sab tez-gām ho jaa.eñ

jo dīda-var haiñ unheñ ham-safar banāte haiñ

kaḌī ho dhuup to do phuul pyaar ke hañs kar

tapīda rāhoñ meñ shāḳh-e-shajar banāte haiñ

kamāl-e-kibr se kahtā thā chārāgar merā

ki ham tufañg o sināñ pusht par banāte haiñ

kabhī sukūñ kabhī josh-e-junūñ kabhī hairat

mirā mizāj mire kūza-gar banāte haiñ

kiyā rahīn-e-hunar ham ko nā-rasā.ī ne

udaas bāñhoñ meñ shams o qamar banāte haiñ

ḳhayāl-e-ḳhair hasīnoñ meñ hai ki vaqt-e-ḳhirām

zamīñ ko mādan-e-lāl-o-guhar banāte haiñ

wajud ko jigar-e-mo'tabar banate hain

alam pe hath to nezon pe sar banate hain

chaman bhi ho koi amboh-e-KHar-o-KHas jaise

ye kar-KHane to barg o samar banate hain

hawa ka tabsira ye sakinan-e-shahr pe tha

ajib log hain pani pe ghar banate hain

qarin-e-aql hai kya koi sochta hi nahin

KHabar uDane se pahle KHabar banate hain

nahin ye shart ki sab tez-gam ho jaen

jo dida-war hain unhen ham-safar banate hain

kaDi ho dhup to do phul pyar ke hans kar

tapida rahon mein shaKH-e-shajar banate hain

kamal-e-kibr se kahta tha chaaragar mera

ki hum tufang o sinan pusht par banate hain

kabhi sukun kabhi josh-e-junun kabhi hairat

mera mizaj mere kuza-gar banate hain

kiya rahin-e-hunar hum ko na-rasai ne

udas banhon mein shams o qamar banate hain

KHayal-e-KHair hasinon mein hai ki waqt-e-KHiram

zamin ko madan-e-lal-o-guhar banate hain