wajud par inhisar maine nahin kiya tha

vajūd par inhisār maiñ ne nahīñ kiyā thā

ki ḳhaak kā e.atibār maiñ ne nahīñ kiyā thā

safed resham kī oḌhnī mere haath meñ thī

magar use dāġhdār maiñ ne nahīñ kiyā thā

ye be-niyāzī kī ḳhū mire husn meñ bahut thī

magar use be-qarār maiñ ne nahīñ kiyā thā

kahīñ se yak-laḳht zindagī merī kaaT degā

jo rāsta iḳhtiyār maiñ ne nahīñ kiyā thā

sumoñ tale rauñd de ḳhushī se magar ye sun le

gunāh ai shahsavār maiñ ne nahīñ kiyā thā

dikhā.ī dene lagā vo ik tīsrā kināra

abhī javānī ko paar maiñ ne nahīñ kiyā thā

ġhurūb kā vaqt thā muqarrar so chal paḌā maiñ

kisī kā phir intizār maiñ ne nahīñ kiyā thā

wajud par inhisar main ne nahin kiya tha

ki KHak ka eatibar main ne nahin kiya tha

safed resham ki oDhni mere hath mein thi

magar use daghdar main ne nahin kiya tha

ye be-niyazi ki KHu mere husn mein bahut thi

magar use be-qarar main ne nahin kiya tha

kahin se yak-laKHt zindagi meri kaT dega

jo rasta iKHtiyar main ne nahin kiya tha

sumon tale raund de KHushi se magar ye sun le

gunah ai shahsawar main ne nahin kiya tha

dikhai dene laga wo ek tisra kinara

abhi jawani ko par main ne nahin kiya tha

ghurub ka waqt tha muqarrar so chal paDa main

kisi ka phir intizar main ne nahin kiya tha