wal-asr zamana mere matlab ka nahin hai

val-asr zamāna mire matlab kā nahīñ hai

ye ā.ina-ḳhāna mire matlab kā nahīñ hai

kahtī haiñ na lā pā.eñgī ye tāb-e-nazāra

āñkhoñ kā bahāna mire matlab kā nahīñ hai

aa.ī huuñ tire vāste jannat se zamīñ par

varna ye Thikāna mire matlab kā nahīñ hai

is meñ hai mirā sānvī kirdār likhārī

terā ye fasāna mire matlab kā nahīñ hai

ik shaḳhs kī ḳhātir hai ye sab milnā-milānā

vaise vo gharānā mire matlab kā nahīñ hai

jī ḳhuub lagā vahshat-e-bedārī-e-shab meñ

din ḳhvāb suhānā mire matlab kā nahīñ hai

jab mujh se tire baare meñ pūchhegā zamāna

kah dūñgī divāna mire matlab kā nahīñ hai

ehsās kā 'nīlam' jo nahīñ tere bayāñ meñ

lafzoñ kā ḳhazāna mire matlab kā nahīñ hai

wal-asr zamana mere matlab ka nahin hai

ye aaina-KHana mere matlab ka nahin hai

kahti hain na la paengi ye tab-e-nazara

aankhon ka bahana mere matlab ka nahin hai

aai hun tere waste jannat se zamin par

warna ye Thikana mere matlab ka nahin hai

is mein hai mera sanwi kirdar likhaari

tera ye fasana mere matlab ka nahin hai

ek shaKHs ki KHatir hai ye sab milna-milana

waise wo gharana mere matlab ka nahin hai

ji KHub laga wahshat-e-bedari-e-shab mein

din KHwab suhana mere matlab ka nahin hai

jab mujh se tere bare mein puchhega zamana

kah dungi diwana mere matlab ka nahin hai

ehsas ka 'nilam' jo nahin tere bayan mein

lafzon ka KHazana mere matlab ka nahin hai