walwala dil ka baDha zulf-e-dota ko dekh kar

valvala dil kā baḌhā zulf-e-dotā ko dekh kar

mast mai-kash ho gayā kaalī ghaTā ko dekh kar

shaad hai yuuñ dil nigāh-e-dil-rubā ko dekh kar

āshnā jis tarah ḳhush ho āshnā ko dekh kar

allah allah ye taḌap is tarah kī vāraftagī

dilrubā ḳhud loT hai dil kī adā ko dekh kar

kahte haiñ vo hashr ke din kaun hogā dād-ḳhvāh

yaad rah saktā hai kab banda ḳhudā ko dekh kar

tum kahāñ se aa rahe ho aise ghabrā.e hue

kyā kaheñge dushman is chāk-e-qabā ko dekh kar

phir chalā aatā hai nāseh maġhz khāne ke liye

kaañp jaatā hai mirā dil is balā ko dekh kar

us galī kā josh-e-vahshat meñ pata miltā na thā

khul ga.iiñ āñkheñ sī tere naqsh-e-pā ko dekh kar

paḌ ga.ī thī tere dil meñ jo girah vo khul paḌī

vā huā ye uqda vā band-e-qabā ko dekh kar

kūcha-e-aġhyār meñ ye be-ḳhudī kaisī 'ḳhayāl'

uḌ ga.e ausān kis ke naqsh-e-pā ko dekh kar

walwala dil ka baDha zulf-e-dota ko dekh kar

mast mai-kash ho gaya kali ghaTa ko dekh kar

shad hai yun dil nigah-e-dil-ruba ko dekh kar

aashna jis tarah KHush ho aashna ko dekh kar

allah allah ye taDap is tarah ki waraftagi

dilruba KHud loT hai dil ki ada ko dekh kar

kahte hain wo hashr ke din kaun hoga dad-KHwah

yaad rah sakta hai kab banda KHuda ko dekh kar

tum kahan se aa rahe ho aise ghabrae hue

kya kahenge dushman is chaak-e-qaba ko dekh kar

phir chala aata hai naseh maghz khane ke liye

kanp jata hai mera dil is bala ko dekh kar

us gali ka josh-e-wahshat mein pata milta na tha

khul gain aankhen si tere naqsh-e-pa ko dekh kar

paD gai thi tere dil mein jo girah wo khul paDi

wa hua ye uqda wa band-e-qaba ko dekh kar

kucha-e-aghyar mein ye be-KHudi kaisi 'KHayal'

uD gae ausan kis ke naqsh-e-pa ko dekh kar