waqar-e-ishq baDhane pe tanz karte hain

vaqār-e-ishq baḌhāne pe tanz karte haiñ

kisī ke naaz uThāne pe tanz karte haiñ

maiñ jān-būjh ke jab in ko chhoḌ detā huuñ

shikār mere nishāne pe tanz karte haiñ

ajiib baat hai yaaro har ik zamāne meñ

zamāne vaale zamāne pe tanz karte haiñ

tujhe ḳhabar hī nahīñ hai ai masḳhare kuchh log

tire mazāq uḌāne pe tanz karte haiñ

surūr-e-ishq kā un ko maza nahīñ ma.alūm

jo log niiñd na aane pe tanz karte haiñ

vo jānte haiñ ki mahfil kī aabrū maiñ huuñ

jo mere bazm meñ aane pe tanz karte haiñ

nahīñ hai sher-o-adab se jinheñ lagāv 'zafar'

vo log mere gharāne pe tanz karte haiñ

waqar-e-ishq baDhane pe tanz karte hain

kisi ke naz uThane pe tanz karte hain

main jaan-bujh ke jab in ko chhoD deta hun

shikar mere nishane pe tanz karte hain

ajib baat hai yaro har ek zamane mein

zamane wale zamane pe tanz karte hain

tujhe KHabar hi nahin hai ai masKHare kuchh log

tere mazaq uDane pe tanz karte hain

surur-e-ishq ka un ko maza nahin malum

jo log nind na aane pe tanz karte hain

wo jaante hain ki mahfil ki aabru main hun

jo mere bazm mein aane pe tanz karte hain

nahin hai sher-o-adab se jinhen lagaw 'zafar'

wo log mere gharane pe tanz karte hain