waqt aafaq ke jangal ka jawan chita hai

vaqt āfāq ke jañgal kā javāñ chītā hai

merī duniyā ke ġhazāloñ kā lahū piitā hai

ishq ne mar ke svayamvar meñ use jiitā hai

dil sirī-rām hai dilbar kī razā siitā hai

ab bhī ghanshyām hai is dasht kā buuTā buuTā

barg ne aaj bhī insāñ ke liye giitā hai

jagmagātī rahī ashkoñ se shab-e-tār-e-hayāt

dīp-mālā kī tarah daur-e-alam biitā hai

koī lahkā jo sar-e-dār to yazdāñ ne kahā

ibn-e-ādam ne mah-o-sāl kā ran jiitā hai

tujhe sajdoñ ke evaz mil na sakī rūh-e-bashar

ham ne sar de ke ḳhudā.ī kā bharam jiitā hai

waqt aafaq ke jangal ka jawan chita hai

meri duniya ke ghazalon ka lahu pita hai

ishq ne mar ke swayamwar mein use jita hai

dil siri-ram hai dilbar ki raza sita hai

ab bhi ghanshyam hai is dasht ka buTa buTa

barg ne aaj bhi insan ke liye gita hai

jagmagati rahi ashkon se shab-e-tar-e-hayat

dip-mala ki tarah daur-e-alam bita hai

koi lahka jo sar-e-dar to yazdan ne kaha

ibn-e-adam ne mah-o-sal ka ran jita hai

tujhe sajdon ke ewaz mil na saki ruh-e-bashar

hum ne sar de ke KHudai ka bharam jita hai