waqt aaKHir le gaya wo shoKHiyan wo bankpan

vaqt āḳhir le gayā vo shoḳhiyāñ vo bāñkpan

phuul se chehre the kitne aur the nāzuk badan

log rakhte haiñ diloñ meñ ātish-e-buġhz-o-hasad

aur phir karte haiñ shikva jal rahā hai tan badan

chal paḌe jab jānib-e-manzil to phir ai ham-safar

kyā safar kī mushkileñ kyā dūriyāñ kaisī thakan

ham nahīñ toḌeñge apnā ittifāq-o-ittihād

kar chuke haiñ faisla ye ab sabhī ahl-e-vatan

un kī sāzish hai ki bas nām-e-vafā miTtā rahe

merī koshish hai phale-phūle vafāoñ kā chalan

jashn hogā phir vafā kā dostī kā ek din

phir sajegī pyaar ke ehsās kī ik anjuman

jo bhī haiñ 'shāyān' ahl-e-zarf un ko ḳhauf kyā

un ke aage sar-nigūñ haiñ vaqt ke dār-o-rasan

waqt aaKHir le gaya wo shoKHiyan wo bankpan

phul se chehre the kitne aur the nazuk badan

log rakhte hain dilon mein aatish-e-bughz-o-hasad

aur phir karte hain shikwa jal raha hai tan badan

chal paDe jab jaanib-e-manzil to phir ai ham-safar

kya safar ki mushkilen kya duriyan kaisi thakan

hum nahin toDenge apna ittifaq-o-ittihad

kar chuke hain faisla ye ab sabhi ahl-e-watan

un ki sazish hai ki bas nam-e-wafa miTta rahe

meri koshish hai phale-phule wafaon ka chalan

jashn hoga phir wafa ka dosti ka ek din

phir sajegi pyar ke ehsas ki ek anjuman

jo bhi hain 'shayan' ahl-e-zarf un ko KHauf kya

un ke aage sar-nigun hain waqt ke dar-o-rasan