waqt apna ho to tufan-o-bala kuchh bhi nahin

vaqt apnā ho to tūfān-o-balā kuchh bhī nahīñ

barq girne ko girī aur huā kuchh bhī nahīñ

maiñ ne ik umr guzārī hai tirī furqat meñ

kyā muqaddar meñ mire is ke sivā kuchh bhī nahīñ

sirf hāthoñ ko uThāne kā natīja kyā hai

ho salīqa na duā kā to duā kuchh bhī nahīñ

jaane bhar jaate haiñ kis tarah guloñ se dāman

mere dāman meñ to kāñToñ ke sivā kuchh bhī nahīñ

baat zaḳhmoñ kī kaho karb kī tashrīh karo

ab mohabbat ke fasāne meñ rahā kuchh bhī nahīñ

dard-o-ġham āh-o-fuġhāñ soz-e-nihāñ ashk ravāñ

dosto is ke sivā merā patā kuchh bhī nahīñ

chañd sikkoñ ke liye shauq se bik jaate haiñ

aaj ke daur meñ insāñ kī anā kuchh bhī nahīñ

raushnī jitnī thī sab luuT lī añdhiyāroñ ne

ab ujāloñ meñ 'sahar' aur bachā kuchh bhī nahīñ

waqt apna ho to tufan-o-bala kuchh bhi nahin

barq girne ko giri aur hua kuchh bhi nahin

main ne ek umr guzari hai teri furqat mein

kya muqaddar mein mere is ke siwa kuchh bhi nahin

sirf hathon ko uThane ka natija kya hai

ho saliqa na dua ka to dua kuchh bhi nahin

jaane bhar jate hain kis tarah gulon se daman

mere daman mein to kanTon ke siwa kuchh bhi nahin

baat zaKHmon ki kaho karb ki tashrih karo

ab mohabbat ke fasane mein raha kuchh bhi nahin

dard-o-gham aah-o-fughan soz-e-nihan ashk rawan

dosto is ke siwa mera pata kuchh bhi nahin

chand sikkon ke liye shauq se bik jate hain

aaj ke daur mein insan ki ana kuchh bhi nahin

raushni jitni thi sab luT li andhiyaron ne

ab ujalon mein 'sahar' aur bacha kuchh bhi nahin