waqt bas rengta hai umr ke sath

vaqt bas reñgtā hai umr ke saath

taara taara ginā hai umr ke saath

kitnā āsān sā ta.alluq thā

kitnā mushkil huā hai umr ke saath

phir safar naam hai aziyyat kā

rāsta hāñptā hai umr ke saath

kis kī āñkhoñ ko niiñd chubhtī hai

kaun jaagā rahā hai umr ke saath

jaane ārām aa.egā kab tak

dard baḌhne lagā hai umr ke saath

ik gunah thā chhupā.e rakkhā thā

sāmne aa gayā hai umr ke saath

zindagī zindagī nahīñ lagtī

koī dhokā huā hai umr ke saath

sub.h-e-kāzib se shām-e-sādiq tak

ek mahshar bapā hai umr ke saath

kaisā chehra hai raat kī tafsīl

kaun jal kar bujhā hai umr ke saath

gard-e-māzī hai vasl kā hāsil

qāfila hijr kā hai umr ke saath

waqt bas rengta hai umr ke sath

tara tara gina hai umr ke sath

kitna aasan sa talluq tha

kitna mushkil hua hai umr ke sath

phir safar nam hai aziyyat ka

rasta hanpta hai umr ke sath

kis ki aankhon ko nind chubhti hai

kaun jaga raha hai umr ke sath

jaane aaram aaega kab tak

dard baDhne laga hai umr ke sath

ek gunah tha chhupae rakkha tha

samne aa gaya hai umr ke sath

zindagi zindagi nahin lagti

koi dhoka hua hai umr ke sath

subh-e-kazib se sham-e-sadiq tak

ek mahshar bapa hai umr ke sath

kaisa chehra hai raat ki tafsil

kaun jal kar bujha hai umr ke sath

gard-e-mazi hai wasl ka hasil

qafila hijr ka hai umr ke sath