waqt-e-ruKHsat har ek baat rone lagi

vaqt-e-ruḳhsat har ik baat rone lagī

āḳhirī thī mulāqāt rone lagī

sar jhukā.e añdheroñ kī āġhosh meñ

jaane kyoñ rāt-bhar raat rone lagī

justujū zindagī ko tabassum kī thī

dekh kar talḳh hālāt rone lagī

asp-o-farzīñ ga.e shutur bhī na rahe

khā ke paidal se shah maat rone lagī

dar se mun.im ke saa.il ko kuchh na milā

ḳhālī dāman pe ḳhairāt rone lagī

rahzanoñ ke sitam zulm ko dekh kar

ab kamīñ-gāh meñ ghaat rone lagī

be-gunāhī thī chehroñ se un ke ayaañ

qaidiyoñ par havālāt rone lagī

narmadā tāptī meñ lahū dekh kar

gul-fishāñ ḳhāk-e-gujrāt rone lagī

har qadam sāzisheñ qatl-o-ġhārat-garī

azmat-e-hind haihāt rone lagī

buġhz-o-nafrat ke sailāb meñ ġhota-zan

gangā-jamanī musāvāt rone lagī

sar matāf-e-haram meñ jhukā jab kabhī

lab pe 'sāḳhir' munājāt rone lagī

waqt-e-ruKHsat har ek baat rone lagi

aaKHiri thi mulaqat rone lagi

sar jhukae andheron ki aaghosh mein

jaane kyon raat-bhar raat rone lagi

justuju zindagi ko tabassum ki thi

dekh kar talKH haalat rone lagi

asp-o-farzin gae shutur bhi na rahe

kha ke paidal se shah mat rone lagi

dar se munim ke sail ko kuchh na mila

KHali daman pe KHairaat rone lagi

rahzanon ke sitam zulm ko dekh kar

ab kamin-gah mein ghat rone lagi

be-gunahi thi chehron se un ke ayan

qaidiyon par hawalat rone lagi

narmada tapti mein lahu dekh kar

gul-fishan KHak-e-gujraat rone lagi

har qadam sazishen qatl-o-ghaarat-gari

azmat-e-hind haihat rone lagi

bughz-o-nafrat ke sailab mein ghota-zan

ganga-jamani musawat rone lagi

sar mataf-e-haram mein jhuka jab kabhi

lab pe 'saKHir' munajat rone lagi