waqt-e-ruKHsat meri man ne mera matha chuma

vaqt-e-ruḳhsat mirī maañ ne mirā māthā chūmā

manziloñ ne tabhī baḌh kar mirā talvā chūmā

dī muazzin ko davā niiñd kī aur phir kal shab

ham ne jī bhar ke tumheñ ḳhvāb meñ dekhā chūmā

jis tarah qīmtī shai ko koī muflis dekhe

āñkhoñ āñkhoñ meñ use ham ne sarāhā chūmā

ham ne sochā thā ki sairābī mayassar hogī

tishnagī aur baḌhī hai use jitnā chūmā

ek misre meñ suno vasl kā puurā qissa

az ishā-tā-ba-sahar yaar ko chūmā chūmā

is tarīqe se nahīñ pyaar jatāyā mujh se

jis tarīqe se hai us ne mirā bachcha chūmā

ye badan dasht se gulshan huā āḳhir kaise

aañkh chūmī hai kisī kī ki hai dariyā chūmā

merī āñkhoñ ke ujāloñ kā sabab hai itnā

naam sunte hī mohammad kā añgūThā chūmā

Thiik hone na diyā zaḳhm-e-mohabbat 'āsī'

ham ne tā-umr ise dil se lagāyā chūmā

waqt-e-ruKHsat meri man ne mera matha chuma

manzilon ne tabhi baDh kar mera talwa chuma

di muazzin ko dawa nind ki aur phir kal shab

hum ne ji bhar ke tumhein KHwab mein dekha chuma

jis tarah qimti shai ko koi muflis dekhe

aankhon aankhon mein use hum ne saraha chuma

hum ne socha tha ki sairabi mayassar hogi

tishnagi aur baDhi hai use jitna chuma

ek misre mein suno wasl ka pura qissa

az isha-ta-ba-sahar yar ko chuma chuma

is tariqe se nahin pyar jataya mujh se

jis tariqe se hai us ne mera bachcha chuma

ye badan dasht se gulshan hua aaKHir kaise

aankh chumi hai kisi ki ki hai dariya chuma

meri aankhon ke ujalon ka sabab hai itna

nam sunte hi mohammad ka anguTha chuma

Thik hone na diya zaKHm-e-mohabbat 'asi'

hum ne ta-umr ise dil se lagaya chuma