waqt ek dariya hai dariya sab baha le jaega

vaqt ik dariyā hai dariyā sab bahā le jā.egā

ham magar tinke haiñ ham tinkoñ se kyā le jā.egā

ik ajab āshob hai kyuuñ bastiyoñ meñ jalvagar

kyā ye har insān se ḳhauf-e-ḳhudā le jā.egā

hai to ḳhurshīd-e-haqīqat par baḌā be-mehr hai

dil se jazbe aañkh se aañsū churā le jā.egā

boriye par baiThne kā lutf hī kuchh aur hai

shahryār-e-asr is takiye se kyā le jā.egā

har guzargāh-e-tamannā par bahut sī gard hai

lekin is ko ek hī jhoñkā uḌā le jā.egā

āfiyat ke dā.eroñ meñ yaar saare band haiñ

koī mausam koī tūfāñ us se kyā le jā.egā

waqt ek dariya hai dariya sab baha le jaega

hum magar tinke hain hum tinkon se kya le jaega

ek ajab aashob hai kyun bastiyon mein jalwagar

kya ye har insan se KHauf-e-KHuda le jaega

hai to KHurshid-e-haqiqat par baDa be-mehr hai

dil se jazbe aankh se aansu chura le jaega

boriye par baiThne ka lutf hi kuchh aur hai

shahryar-e-asr is takiye se kya le jaega

har guzargah-e-tamanna par bahut si gard hai

lekin is ko ek hi jhonka uDa le jaega

aafiyat ke daeron mein yar sare band hain

koi mausam koi tufan us se kya le jaega